Du skal gjennom forsøk og naturvitskapleg metode prøva å setja riktig namn på sju stoff som læraren tar med seg frå kjøkkenet.

Du får utlevert sju kvite stoff:

• sitronsyre
• bakepulver
• sukker
• salt
• hornsalt
• natron
• kveitemjøl

Stoffa er merka med tala 1–7, og oppgåva di handlar om å bestemma kva prøve som inneheld kva. NB! Det er ikkje lov å smaka på stoffa.

DU TRENG:

• Utstyr og stoff frå naturfagsrommet

DETTE GJER DU:

1. Saman med læringsgruppa skal du planleggja korleis du kan bestemma innhaldet i prøvane.
2. Når dokker har laga ein plan, skal dokker diskutera framgangsmåtane i læringsgruppa.
3. Læringsgruppa, som skal gjennomføra forsøket saman, blir samde om ein endeleg plan for forsøket.
4. Læraren må godkjenna den endelege planen, før dokker startar på forsøket.

OBSERVASJONAR OG FORKLARINGAR:

Noter resultata i ein oversiktleg tabell. Ta med reaksjonslikningar, viss dokker finn ut av dei.

DRØFT:

Kva gjorde dei andre gruppene? Kom dokker fram til same resultat? Drøft framgangsmåtar, resultat og konklusjonar i klassen.

TIPS:

• Finn fram til kjemisk formel for stoffa, og nokre typiske eigenskapar og kjemiske reaksjonar for dei.
• Fagartikkelen om julekakekjemi kan vera nyttig.
• Eksempel på prøvar som dokker kan gjennomføra:
  • undersøkja surleiksgraden av stoffet løyst i vatn
  • varma opp stoffet for å sjå kva som skjer
  • sjå på løyselegheita i kaldt vatn
  • undersøka om stoffet løyser seg lettare dersom me varmar opp vatnet
  • tilsetja ei syre
  • tilsetja ein base
  • lukta på stoffet (ikkje smaka!)
  • tilsetja NTB
  • tilsetja Lugols løysing