FØREMÅL: Dette er ei tryggleiksøving som òg har eit lite meditasjonspreg over seg.
UTSTYR: Ingenting.
FRAMGANGSMÅTE:
- Deltakarane blir delte inn i grupper på fem–seks personar.
- Gruppene stiller seg rundt på golvet med god avstand til kvarandre.
- Kvar gruppe dannar ein tett sirkel rundt éin av deltakarane.
- Deltakaren i midten lukker augene, slappar av og står opp med armane tett inntil kroppen.
- Medan deltakaren i midten står heilt i ro, fører dei andre deltakarane i gruppa kroppen til den i midten forsiktig fram og tilbake rundt i ringen. Det er viktig at alle er konsentrerte, slik at «tømmerstokken» ikkje fell i golvet.
- Når gruppa byrjar å få kontroll på føringa, kan dei utvida diameteren på ringen og skubba kroppen til den i midten forsiktig fram og tilbake.
- Gruppa rullerer på kven som står i midten, slik at alle får prøvd seg.
Tips: Denne øvinga er tufta på tillit og konsentrasjon, og her får instruktøren/leiaren ei viktig observasjonsrolle. Den som står i midten må alltid kjenna seg trygg, elles vil ikkje øvinga fungera.
